ಮಂಗಳೂರು: ಪೆರ್ಮಂಕಿಯಲ್ಲಿ ಉದ್ಯಮಿಯ ಮನೆ ದರೋಡೆ, ಉಳ್ಳಾಲದಲ್ಲಿ ರಾತ್ರಿ ನಾಲೈದು ಮನೆಯ ಕದ ತಟ್ಟಿದ ಆಗುಂತುಕರು, ಬಜಪೆಯಲ್ಲಿ ಹಾಡಹಗಲೇ ಫೈನಾನ್ಸ್‌ಗೆ ನುಗ್ಗಿ ದರೋಡೆಗೆ ಯತ್ನಿಸಿದ ಗ್ಯಾಂಗ್, ಉಳ್ಳಾಲ ಧರ್ಮನಗರದಲ್ಲಿ ಮನೆಗೆ ನುಗ್ಗಿ ಚಿನ್ನಾಭರಣ ಕಳವು, ಕೋಡಿಕಲ್‌ನಲ್ಲಿ ಕಿಟಕಿಯ ಗ್ರಿಲ್ ತುಂಡರಿಸಿ ಮನೆ ಪ್ರವೇಶಿಸಿ ಹಣ. ದೋಚಿದ ಚಡ್ಡಿ ಗ್ಯಾಂಗ್…
ಇದು ರೀಸೆಂಟ್ ಆಗಿ ಮಂಗಳೂರಿನಲ್ಲಿ ನಡೆದ ಕಳ್ಳತನ, ದರೋಡೆಯ ಕೆಲವು ಘಟನೆಗಳು ಮಂಗಳೂರು ನಗರ ಸೇರಿದಂತೆ ನಗರದ ಹೊರವಲಯದಲ್ಲಿ ಸಾಲು ಸಾಲು ಕಳ್ಳತನ ಪ್ರಕರಣಗಳು ನಡೆಯುತ್ತಿವೆ. ಕಳ್ಳರಿಗೆ ಪೊಲೀಸರ ಭಯ ಇಲ್ಲವಾಗಿದೆ. ನಿತ್ಯ ಒಂದಲ್ಲಾ ಒಂದು ಅಪರಾಧ ಪ್ರಕರಣಗಳು ಬೆಳಕಿಗೆ ಬರುತ್ತಿದ್ದು, ನಗರವಾಸಿಗಳಲ್ಲಿ ಭಯಾತಂಕ ಹೆಚ್ಚಾಗಿದೆ. ಆದ್ದರಿಂದ ಸಾರ್ವಜನಿಕರು ಅಲರ್ಟ್ ಆಗಿರುವುದು ಒಳಿತು.
ಕೋಡಿಕಲ್‌ನಲ್ಲಿ ಕಳ್ಳರ ಗ್ಯಾಂಗ್
ಕಳ್ಳರು, ದರೋಡೆಕೋರರರು ಗ್ಯಾಂಗ್ ಕಟ್ಟಿಕೊಂಡು ಕಾರ್ಯಾಚರಣೆಗಿಳಿಯುವುದು ಕಂಡುಬರುತ್ತಿದೆ. ಪೆರ್ಮಂಕಿ, ಬಜಪೆ, ಉಳ್ಳಾಲ ಸೇರಿದಂತೆ ಹಲವೆಡೆ ನಡೆದ ಪ್ರಕರಣಗಳಲ್ಲಿ ದರೋಡೆಕೊರರು ಒಂದು ಗ್ಯಾಂಗ್ ಆಗಿದ್ದುದು ಸ್ಪಷ್ಟವಾಗಿದೆ. ಕೋಡಿಕಲ್‌ನಲ್ಲೂ ಒಂದು ತಂಡ ಶನಿವಾರ ತಡರಾತ್ರಿ ಮನೆಗೆ ನುಗ್ಗಿ ಕಳ್ಳತನ ನಡೆಸಿದೆ. ಕೇವಲ ಚಡ್ಡಿ ಬನಿಯಾನ್‌ನೊಂದಿಗೆ ಕಾಣಿಸಿಕೊಂಡಿರುವ ಈ ತಂಡದ ಕಾರ್ಯಾಚರಣೆಯ ದೃಶ್ಯಾವಳಿ ಸಿಸಿ ಕ್ಯಾಮೆರಾದಲ್ಲಿ ಸೆರೆಯಾಗಿದೆ.
ಚಡ್ಡಿ ಗ್ಯಾಂಗ್ ಬಗ್ಗೆ ಇರಲಿ ಎಚ್ಚರ !
ಮಂಗಳೂರು ನಗರದಲ್ಲಿ ಚಡ್ಡಿ ಗ್ಯಾಂಗ್ ಒಂದು ಕಾರ್ಯಾಚರಿಸುತ್ತಿರುವ ಬಗ್ಗೆಯೂ ಪೊಲೀಸರಿಗೆ ಮಾಹಿತಿ ಲಭಿಸಿದೆ. ರಾತ್ರಿ ವೇಳೆ ಕಳ್ಳತನಕ್ಕೆ ಇಳಿಯುವ ಖದೀಮರು ಚಡ್ಡಿ ಬನಿಯನ್‌ನಲ್ಲಿ ಕಾಣಿಸಿಕೊಳ್ಳುತ್ತಿದ್ದು, ಈ ಬಗ್ಗೆ ಸಾರ್ವಜನಿಕರಿಗೆ ಮಾಹಿತಿ ಸಿಕ್ಕ ತಕ್ಷಣ ಪೊಲೀಸ್ ಇಲಾಖಗೆ ಮಾಹಿತಿ ನೀಡಬೇಕು ಎಂದು ಪೊಲೀಸರು ತಿಳಿಸಿದ್ದಾರೆ. ಮಂಗಳೂರು ನಗರದಲ್ಲಿ ಅಂತಾರಾಜ್ಯ ಕಳ್ಳರು / ಚಡ್ಡಿ ಗ್ಯಾಂಗ್ /ಮನೆ ಕಳ್ಳತನ ಮಾಡುವವರು ಸಂಚರಿಸುತ್ತಿರುವ ಬಗ್ಗೆ ಮಾಹಿತಿ ಇರುವುದರಿಂದ ಸಾರ್ವಜನಿಕರು ಹೆಚ್ಚಿನ ಜಾಗ್ರತೆಯನ್ನು ವಹಿಸಬೇಕು ಎಂದು ಉರ್ವಾ ಠಾಣಾ ಪೊಲೀಸರು ಪ್ರಕಟಣೆ ಹೊರಡಿಸಿದ್ದಾರೆ.
