ಬೈಕ್‌ ಸವಾರನಿಗೆ ಗಾಯ
ಕೋಟ : ಯಡ್ಯಾಡಿ-ಮತ್ಯಾಡಿ ಗ್ರಾಮದ ಹಾವು ಕಚ್ಚುವ ಹಾಡಿ ಎಂಬಲ್ಲಿ ಕಾಡುಹಂದಿ ಹಠಾತ್‌ ಅಡ್ಡ ಬಂದಿದ್ದರಿಂದ ಬೈಕ್‌ ನಿಯಂತ್ರಣ ತಪ್ಪಿ ಮಗುಚಿ ರಸ್ತೆಗೆ ಬಿದ್ದು ಸವಾರ ರಾಜಾರಾಮ್ (55 ವರ್ಷ) ಅವರಿಗೆ ಗಂಭೀರ ಗಾಯವಾಗಿದ್ದು ಅವರನ್ನು ಮಣಿಪಾಲ ಖಾಸಗಿ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಕೋಟ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ಕಾರು ಮುಖಾಮುಖಿ ಢಿಕ್ಕಿ
ಕೊಲ್ಲೂರು : ಕೊಲ್ಲೂರು ಆನೆಜರಿ ತಿರುವಿನ ರಾಜ್ಯ ಹೆದ್ದಾರಿಯಲ್ಲಿ ಕುಂದಾಪುರದಿಂದ ಕೊಲ್ಲೂರು ಕಡೆಗೆ ಸಾಗುತ್ತಿದ್ದ ಕಾರೊಂದು ಎದುರಿನಿಂದ ಬರುತ್ತಿದ್ದ ಇನೋವಾ ಕಾರಿಗೆ ಡಿಕ್ಕಿ ಹೊಡೆದು ಮಗುಚಿದ ಪರಿಣಾಮ ಕಾರಿನ ಚಾಲಕ ಮನೋಜ್ ಹನುಮ ದಿನೇಶ್‌ ಗಾಯಗೊಂಡಿದ್ದಾರೆ. ಕೊಲ್ಲೂರು ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ಬಿಯರ್ ಬಾಟಲಿಯಿಂದ ಹಲ್ಲೆ
ಬೈಂದೂರು : ನಂದನವನ ಸರ್ಕಲ್ ಬಳಿ ಸುಬ್ರಹ್ಮಣ್ಯ ಎಂಬಾತ ಏಕಾಏಕಿ ಬಿಯರ್ ಬಾಟಲಿಯಿಂದ ಹಲ್ಲೆ ನಡೆಸಿ ಜೀವ ಬೆದರಿಕೆಯೊಡ್ಡಿದ್ದಾನೆ ಎಂದು ರವೀಂದ್ರ ನೀಡಿದ ದೂರಿನಂತೆ ಬೈಂದೂರು ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ಇಸ್ಪೀಟು ಜುಗಾರಿ: ನಾಲ್ವರ ಬಂಧನ
ಕಂಡ್ಲೂರು : ನೇರಳಕಟ್ಟೆ ಸಮೀಪದ ಜಾಡ್ಕಟ್ಟು ಸರಕಾರಿ ಹಾಡಿಯಲ್ಲಿ ಅಂದ -ಬಾಹರ್ ಇಸ್ಪೀಟು ಆಡುತ್ತಿದ್ದ ನಾಲ್ವರನ್ನು ಕಂಡ್ಲೂರು ಗ್ರಾಮಾಂತರ ಠಾಣೆ ಪಿ ಎಸ್‌ ಐ ನೂತನ್‌ ರವರು ವಶಕ್ಕೆ ತೆಗೆದುಕೊಂಡಿದ್ದಾರೆ. ಅವರಿಂದ 2200 ರೂ. ಮತ್ತು ಇಸ್ಪೀಟು ಎಲೆ ಸ್ವಾಧೀನಪಡಿಸಿಕೊಳ್ಳಲಾಗಿದ್ದು ಕಂಡ್ಲೂರು ಗ್ರಾಮಾಂತರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ
ಸ್ಕೂಟಿ ಮಗುಚಿ ಗಾಯ
ಗಂಗೊಳ್ಳಿ : ಹಕ್ಲಾಡಿ-ಯಳೂರು ರಸ್ತೆಯಲ್ಲಿ ಬಾಳೆಮನೆಬೈಲು ಎಂಬಲ್ಲಿ ಅಡ್ಡ ಬಂದ ನಾಯಿಯನ್ನು ತಪ್ಪಿಸುವ ಸಂದರ್ಭದಲ್ಲಿ ಸ್ಕೂಟರ್ ಮಗುಚಿದ ಪರಿಣಾಮ ಸವಾರ ಸತೀಶ್‌ ಭಂಡಾರಿ, ಸಹಸವಾರ ಅಯೂಬ್ ಗಾಯಗೊಂಡಿದ್ದಾರೆ. ಗಂಗೊಳ್ಳಿ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ
