ಚಿನ್ನಾಭರಣ ಕಳವು
ಕೊಲ್ಲೂರು : ಕೊಲ್ಲೂರು ಗ್ರಾಮದ ನಿವಾಸಿ ಸುಶೀಲಾ ಎಂಬವರು ಸಂಬಂಧಿಕರ ಮನೆಗೆ ಮದುವೆ ಕಾರ್ಯಕ್ರಮಕ್ಕೆ ಹೋಗುವಾಗ ಮನೆಯಲ್ಲಿದ್ದ 6 ಗ್ರಾಂ ತೂಕದ ಬೆಂಡೋಲೆ 2 ಜತೆ, 1 ಪವನ್ ಜುಮ್ಮಿ, 3 ಗ್ರಾಂ ತಾಯರ, ತಲಾ 3 ಗ್ರಾಂ ತೂಕದ 3 ಟಿಕ್ಕಿ, ಮೂರುವರೆ ಪವನ್ ಚಿನ್ನದ ಸರ, 3 ಪವನ್ ಚಿನ್ನದ ಸರ, 7 ಗ್ರಾಂ ಚಿನ್ನದ ಉಂಗುರ, 22000 ರೂ. ಹಣವನ್ನು ಒಂದು ಕವರಿನಲ್ಲಿ ತುಂಬಿಸಿ ಚೇಲದಲ್ಲಿರಿಸಿ ಹೊಸೂರಿನ ಕಾನಬೇರು ಎಂಬಲ್ಲಿಗೆ ಮದುವೆಗೆ ಹೋಗಿದ್ದರು. ಮದುವೆ ಮುಗಿಸಿ ವಾಪಸ್ ಬಂದು ನೋಡುವಾಗ ಚೀಲದಲ್ಲಿದ್ದ ಚಿನ್ನಾಭರಣಗಳ ಕವ‌ರ್ ಹಾಗೂ ನಗದು ಕಳವು ಆಗಿದ್ದು ಈ ಬಗ್ಗೆ ಕೊಲ್ಲೂರು ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ
ಬೈಕ್ ಪಲ್ಟಿ: ಯುವಕ ಸಾವು
ಕೋಟ: ಬೈಕ್ ಪಲ್ಟಿಯಾಗಿ ಸವಾರ ಸ್ಥಳದಲ್ಲೇ ಮೃತಪಟ್ಟ ಘಟನೆ ರಾಷ್ಟ್ರೀಯ ಹೆದ್ದಾರಿ ಕೋಟ ಮಸೀದಿ ಸಮೀಪ ನಡೆದಿದೆ.ಮಣೂರು ಸುರೇಶ್ ಆಚಾರ್ಯ ಅವರ ಪುತ್ರ ವಿಕಾಸ್ ಆಚಾರ್ಯ(22ವರ್ಷ) ಮೃತಪಟ್ಟವರು. ಅವರು ಸಾಸ್ತಾನದಿಂದ ಕೋಟ ಮಣೂರು ಕಡೆಗೆ ಬರುತ್ತಿದ್ದ ವೇಳೆ ಕೋಟದಲ್ಲಿ ನಿಯಂತ್ರಣ ತಪ್ಪಿ ಹೆದ್ದಾರಿಯ ಡಿವೈಡರ್‌ಗೆ ಡಿಕ್ಕಿ ಹೊಡೆದು ಪಲ್ಟಿಯಾಗಿ ಮೃತಪಟ್ಟಿದ್ದಾರೆ ಕೋಟ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ
ಜುವೆಲ್ಲರಿ ಅಂಗಡಿಯಲ್ಲಿ ಕಳವು
ಬೈಂದೂರು ತಾಲೂಕಿನ ಶಿರೂರು ಕೆಳಪೇಟೆಯಲ್ಲಿರುವ ಜುವೆಲ್ಲರಿಯಲ್ಲಿ ಕಳವು ನಡೆದಿದೆ. ಇಲ್ಲಿನ ಹೊನ್ನಮಾಸ್ತಿ ಕಾಂಪ್ಲೆಕ್ಸ್‌ನಲ್ಲಿ ಶಾಂತಾದುರ್ಗಾ ಚಾಮುಂಡೇಶ್ವರಿ ಜುವೆಲ್ಲರಿ ವರ್ಕ್ಸ್ ಶಾಪ್ ನಡೆಸಿಕೊಂಡಿರುವ ಮಹೇಶ್ ಏ.22ರಂದು ಅಂಗಡಿ ವ್ಯವಹಾರ ಮುಗಿಸಿ ರಾತ್ರಿ 8.00ಗಂಟೆಗೆ ಬಾಗಿಲು ಹಾಕಿ ಮನೆಗೆ ಹೋಗಿದ್ದರು. ಮಂಗಳವಾರ ಬೆಳಗ್ಗೆ ಬಂದು ನೋಡುವಾಗ ಅಂಗಡಿಯ ಶೆಟರ್‌ನ ಬೀಗ ಮುರಿದಿರುವುದು ಕಂಡುಬಂದಿದೆ. ಒಳಗಡೆ ಪರಿಶೀಲಿಸಿದಾಗ ಕ್ಯಾಶ್‌ ಕೌಂಟರ್‌ನಲ್ಲಿರಿಸಿದ್ದ 40 ಸಾವಿರ ರೂ., ಹಳೆಯ ಬೆಳ್ಳಿ ಜುವೆಲ್ಲರಿ ಸಾಮಾಗ್ರಿ, 6 ಗ್ರಾಂ ತೂಕದ ಚಿನ್ನದ ಚೂರುಗಳು ಕಳವಾಗಿತ್ತು. ಅಂದಾಜು 1.40 ಲಕ್ಷ ರೂ.ಮೌಲ್ಯದ ಸೊತ್ತು ಕಳವು ಆಗಿದೆ ಬೈಂದೂರು ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
