89
ಪಾಲಿಗಂಜ್ : ಕಾಂಗ್ರೆಸ್ ಹಿರಿಯ ನಾಯಕ ರಾಹುಲ್ ಗಾಂಧಿ ಭಾಗಿಯಾಗಿದ್ದ ಚುನಾವಣಾ ಕಾರ್ಯಕ್ರಮವೊಂದರ ವೇದಿಕೆ ಕೆಲವೇ ಕ್ಷಣಗಳಲ್ಲಿ ಎರಡು ಬಾರಿ ಕುಸಿದು ಆತಂಕ ಸೃಷ್ಟಿಸಿದ ಘಟನೆ ಸೋಮವಾರ ಬಿಹಾರದಲ್ಲಿ ನಡೆದಿದೆ.
ಪಾಟಲಿಪುತ್ರ ಲೋಕಸಭಾ ಕ್ಷೇತ್ರಕ್ಕೆ ಸ್ಪರ್ಧಿಸಿರುವ ಮಿಸಾ ಭಾರತಿ ಪರ ಪ್ರಚಾರಕ್ಕೆ ರಾಹುಲ್ ಗಾಂಧಿ ಪಾಲಿಗಂಜ್‌ಗೆ ಆಗಮಿಸಿದ್ದರು. ರಾಹುಲ್ ವೇದಿಕೆ ಮೇಲೆ ಆಗಮಿಸುತ್ತಲೇ ಒಮ್ಮೆ ಇದ್ದಕ್ಕಿದ್ದಂತೆ ವೇದಿಕೆ ಕೆಲವು ಅಡಿ ಕುಸಿಯಿತು. ಈ ವೇಳೆ ಒಮ್ಮೆ ಎಲ್ಲರೂ ಆಯ ತಪ್ಪಿ ಬೀಳುವಂತಾದರೂ ಸುಧಾರಿಸಿಕೊಂಡರು. ಈ ವೇಳೆ ರಾಹುಲ್ ಪಕ್ಕದಲ್ಲೇ ಇದ್ದ ಮಿಸಾ ಭಾರತಿ ರಾಹುಲ್ ಅವರನ್ನು ಹಿಡಿದುಕೊಂಡರು ಇದರಿಂದ ಸಾವರಿಸಿಕೊಂಡು ರಾಹುಲ್ ಪಕ್ಕಕ್ಕೆ ಒಂದು ಹೆಜ್ಜೆ ಇಡುತ್ತಲೇ ಮತ್ತೆ ವೇದಿಕೆ ಕುಸಿದು ಭಾರೀ ಆತಂಕ ಸೃಷ್ಟಿಯಾಯಿತು. ಕೂಡಲೇ ಎಸ್‌ಪಿಜಿ ಸಿಬ್ಬಂದಿ ರಾಹುಲ್ ಅವರನ್ನು ಸುತ್ತುವರೆದು ಅವರನ್ನು ರಕ್ಷಿಸುವ ಕೆಲಸ ಮಾಡಿದರು. ಬಳಿಕ ಸುಧಾರಿಸಿಕೊಂಡ ರಾಹುಲ್ ಕಾರ್ಯಕ್ರಮದಲ್ಲಿ ಭಾಗಿಯಾದರು.
