ಚಿಕ್ಕನ್‌ ಸಾಲ್‌ ರಸ್ತೆ ಬ್ಲಾಕ್‌
ಕುಂದಾಪುರ : ಕುಂದಾಪುರ ನಗರದಿಂದ ರಾಷ್ಟ್ರೀಯ ಹೆದ್ದಾರಿಯನ್ನು ಸೇರಿಸುವ ಚಿಕ್ಕನ್‌ ಸಾಲ್‌ ಮಾರ್ಗ ಮಧ್ಯದಲ್ಲಿ ಅಶ್ವಥ ಮರದ ಕೊಂಬೆಯೊಂದು ಇಂದು ಸಂಜೆ ವೇಳೆ ಮುರಿದು ಬಿದ್ದ ಪರಿಣಾಮ ಚಿಕ್ಕನ್‌ ಸಾಲ್‌ ರಸ್ತೆಯಲ್ಲಿ ಸಂಚಾರಕ್ಕೆ ತಡೆಯುಂಟಾಗಿ ವಾಹನ ಸಂಚಾರ ಸಂಪೂರ್ಣ ಅಸ್ತವ್ಯಸ್ತವಾಗಿದೆ
ಚಿಕ್ಕನ್‌ ಸಾಲ್‌ ರಸ್ತೆಯ ದಫೇದಾರ್‌ ಕಾಂಫ್ಲೆಕ್ಸ್‌ ಹಾಗೂ ಅಮ್ಮರಸನ ಕಾಂಫ್ಲೆಕ್ಸ್‌ ಬಳಿ ಇರುವ ನಾಗನ ಕಟ್ಟೆಯ ಅಶ್ವಥ ಮರದ ಕೊಂಬೆಯೊಂದು ಯಾವುದೇ ಗಾಳಿ ಮಳೆ ಇಲ್ಲದೆ ಮುರಿದು ಬಿದ್ದಿದೆ
ಸಂಜೆಯ ವೇಳೆಗೆ ಜನನಿಬಿಡವಾದ ಈ ರಸ್ತೆಯಲ್ಲಿ ಶಾಲಾ ವಾಹನಗಳು ಸಂಚರಿಸುತ್ತಿದ್ದು ಕೊಂಬೆ ಮುರಿತದ ಸಮಯದಲ್ಲಿ ಯಾವುದೇ ರೀತಿಯ ಅನಾಹುತಗಳು ನಡೆಯಲಿಲ್ಲ ಪಕ್ಕದಲ್ಲಿ ನಿಲ್ಲಿಸಿದ ಬೈಕೊಂದು ಜಖಂ ಆಗಿದ್ದು ವಿದ್ಯುತ್‌ ತಂತಿಗಳು ಹಾಗೂ ವಿದ್ಯುತ್‌ ಕಂಬಗಳು ಮುರಿದು ಬಿದ್ದಿದೆ
ಸುದ್ದಿ ತಿಳಿಯುತ್ತಿದ್ದಂತೆ ಮೆಸ್ಕಾಂನ ಆಧಿಕಾರಿಗಳು ಹಾಗೂ ಸಿಬ್ಬಂದಿ ವರ್ಗ ಪುರಸಭೆಯ ಅಧಿಕಾರಿಗಳು ಮತ್ತು ಅರಣ್ಯ ಇಲಾಖೆಯ ಸಿಬ್ಬಂದಿಗಳು ಆಗಮಿಸಿ ರಸ್ತೆಗೆ ಅಡ್ಡವಾಗಿ ಬಿದ್ದ ಮರದ ಕೊಂಬೆಗಳನ್ನು ತೆರವುಗೊಳಿಸಲು ಶ್ರಮಿಸುತ್ತಿದ್ದಾರೆ
