ನವದೆಹಲಿ: ಮಧ್ಯ ಪ್ರಾಚ್ಯದಲ್ಲಿ ನಡೆಯುತ್ತಿರುವ ಸಂಘರ್ಷಕ್ಕೆ ಸಂಬಂಧಿಸಿದ ಜಾಗತಿಕ ಇಂಧನ ವೆಚ್ಚಗಳನ್ನು ಭರಿಸಲು ಸರಕಾರಿ ಸ್ವಾಮ್ಯದ ತೈಲ ಮಾರುಕಟ್ಟೆ ಕಂಪನಿಗಳು ಹೆಣಗಾಡುತ್ತಿರುವುದರಿಂದ, ಭಾರತದಲ್ಲಿ ದೇಶೀಯ ಅಡುಗೆ ಅನಿಲ ಬೆಲೆಗಳು ಇಂದಿನಿಂದ(ರವಿವಾರ) ಪ್ರತಿ ಸಿಲಿಂಡರ್ಗೆ 29 ರೂ.ಗಳಷ್ಟು ಏರಿಕೆಯಾಗಿವೆ, ಇದು ಮೂರು ತಿಂಗಳಲ್ಲಿ ಎರಡನೇ ಪರಿಷ್ಕರಣೆಯಾಗಿದ್ದು, ಕೇಂದ್ರ ಸರಕಾರದ ವಿರುದ್ಧ ವ್ಯಾಪಕ ಟೀಕೆಗೆಗಳು ಕೇಳಿ ಬರುತ್ತಿವೆ.
ಇಂದಿನ ಹೆಚ್ಚಳದಿಂದಾಗಿ ದೆಹಲಿಯಲ್ಲಿ 14.2 ಕೆಜಿ ಗೃಹಬಳಕೆಯ ಎಲ್ಪಿಜಿ ಸಿಲಿಂಡರ್ ಬೆಲೆ 913 ರೂ.ಗಳಿಂದ 942 ರೂ.ಗಳಿಗೆ ಏರಿಕೆಯಾಗಿದೆ. ಮಧ್ಯ ಪ್ರಾಚ್ಯದಲ್ಲಿನ ವ್ಯತ್ಯಯಗಳು ಅಂತಾರಾಷ್ಟ್ರೀಯ ಇಂಧನ ಬೆಲೆಗಳನ್ನು ತೀವ್ರವಾಗಿ ಹೆಚ್ಚಿಸಿದ ನಂತರ ಮಾರ್ಚ್ 7 ರಂದು ಘೋಷಿಸಲಾದ 60 ರೂ.ಗಳ ಹೆಚ್ಚಳದ ನಂತರ ಈ ದರ ಪರಿಷ್ಕರಣೆ ಮಾಡಲಾಗಿದೆ.
ಈ ಬೆಳವಣಿಗೆ ಹಣದುಬ್ಬರದ ಮೇಲಿನ ರಾಜಕೀಯ ಹೋರಾಟವನ್ನು ಮತ್ತೆ ಪ್ರಚೋದಿಸಿದ್ದು, ನರೇಂದ್ರ ಮೋದಿ ಸರಕಾರವು ಈಗಾಗಲೇ ಹೆಚ್ಚುತ್ತಿರುವ ಜೀವನ ವೆಚ್ಚಗಳಿಂದ ಬಳಲುತ್ತಿರುವ ಜನರ ಮೇಲೆ ಮತ್ತೊಂದು ಹೊರೆ ಹೇರಿದೆ ಎಂದು ಕಾಂಗ್ರೆಸ್ ಆರೋಪಿಸಿದೆ. ಕೇಂದ್ರ ಸರಕಾರವು ಜಾಗತಿಕ ಇಂಧನ ಆಘಾತದ ಸಂಪೂರ್ಣ ಪರಿಣಾಮದಿಂದ ಗ್ರಾಹಕರನ್ನು ರಕ್ಷಿಸಲಾಗುತ್ತಿದೆ ಎಂದು ವಾದಿಸುತ್ತಿದೆ.
