ಶಿರೂರು: ಶಿವಮೊಗ್ಗ ಲೋಕಸಭಾ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿ ಬಿ.ವೈ. ರಾಘವೇಂದ್ರ ಅವರಿಗೆ ಬೈಂದೂರು ವಿಧಾನಸಭಾ ಕ್ಷೇತ್ರದಿಂದಲೇ ಒಂದು ಲಕ್ಷಕ್ಕೂ ಅಧಿಕ ಲೀಡ್ ನೀಡಲೇಬೇಕು ಎಂದು ದೃಢ ಸಂಕಲ್ಪ ಮಾಡಿರುವ ಶಾಸಕರಾದ ಗುರುರಾಜ ಗಂಟಿಹೊಳೆ ಅವರು ಈಗಾಗಲೇ 200ಕ್ಕೂ ಅಧಿಕ ಬೂತ್ ಗಳಲ್ಲಿ ಸಂಚಾರ ಮಾಡಿದ್ದಾರೆ.
ಶಿರೂರು ವ್ಯಾಪ್ತಿಯ 15 ಬೂತ್ ಗಳಲ್ಲಿ ಸಂಚರಿಸಿ, ಕಾರ್ಯಕರ್ತರು ಹಾಗೂ ಮತದಾರರ ಸಭೆ ನಡೆಸಿ ಚುನಾವಣೆ ಪ್ರಚಾರ ಪ್ರಕ್ರಿಯೆಗೆ ವೇಗ ನೀಡಿದ್ದಾರೆ. ಶಿರೂರು ನಂತರ ಕೆರ್ಗಾಲು ಭಾಗದ 5 ಬೂತ್ ಗಳಲ್ಲಿ ಸಭೆ ನಡೆಸಿದ್ದಾರೆ.
ಕಾರ್ಯಕರ್ತರ ಮನೆಯಲ್ಲಿ ಅಥವಾ ಮನೆಯ ಪರಿಸರದಲ್ಲೇ ಬೂತ್ ಕಡೆಗೆ ಸಮೃದ್ಧ ನಡಿಗೆ ಕ್ರಮ ನಡೆಯುತ್ತಿರುವುದರಿಂದ ಗ್ರಾಮೀಣ ಭಾಗದಲ್ಲಿ ಶಾಸಕರು ಹೆಚ್ಚು ಹೆಚ್ಚು ಆಪ್ತರಾಗುತ್ತಿದ್ದಾರೆ. ಕಾರ್ಯಕರ್ತರು, ಮುಖಂಡರು ಹಾಗೂ ಗ್ರಾಮಸ್ಥರು ಉತ್ಸಾಹದಿಂದ ನಡಿಗೆಯಲ್ಲಿ ಶಾಸಕರಿಗೆ ಸಾಥ್ ನೀಡುತ್ತಿದ್ದಾರೆ. ನಮ್ಮೂರಿನ ಶಾಸಕರು ಬರುತ್ತಿದ್ದಾರೆ. ನಾವು ಶಾಸಕರೊಂದಿಗೆ ಇರಬೇಕು ಎನ್ನುವ ಅಭಿವ್ಯಕ್ತಿಯನ್ನು ಗ್ರಾಮದ ಜನರು ತೋರಿಸುತ್ತಿದ್ದಾರೆ. ಈವರೆಗೆ ನಡೆದ 200ಕ್ಕೂ ಅಧಿಕ ಬೂತ್ ಭೇಟೆಯಲ್ಲಿ ಅದೆಷ್ಟೋ ಹೊಸ ಕಾರ್ಯಕರ್ತರು ಬಿಜೆಪಿ ಸಂಘಟನಾತ್ಮಕ ಕಾರ್ಯವ್ಯಾಪ್ತಿಗೆ ಬಂದಿದ್ದಾರೆ. ಬೂತ್ ಗಳಲ್ಲೂ ಪಕ್ಷ ಸಂಘಟನೆ ಬಲವಾಗುತ್ತಿದೆ.
