ಮಂಡ್ಯ : ಪ್ರಧಾನಿ ಮೋದಿ ದೇಶ ಕಂಡ ಒಬ್ಬ ಅತ್ಯುತ್ತಮ ನಾಯಕ ದೈವಾಂಶ ಸಂಭೂತ ಸಂಸ್ಕಾರವಂತ ಎಂದು ಮಾಜಿ ಪ್ರಧಾನಿ ಎಚ್.ಡಿ.ದೇವೇಗೌಡ ಬಣ್ಣಿಸಿದ್ದಾರೆ. ನಾಗಮಂಗಲ ತಾಲೂಕು ಆದಿ ಚುಂಚನಗಿರಿಯಲ್ಲಿ ಗುರುವಾರ ಭೈರವೈಕ್ಯ ಶ್ರೀ ಬಾಲಗಂಗಾಧರನಾಥ ಸ್ವಾಮೀಜಿಯವರ ಜಯಂತ್ಯುತ್ಸವದಲ್ಲಿ ಪಾಲ್ಗೊಂಡು ಅವರು ಮಾತನಾಡಿದರು.
ಕಳೆದ 60 ವರ್ಷಗಳಲ್ಲಿ ನಾನು ಯಾರನ್ನೂ ನಾಯಕನೆಂದು ಒಪ್ಪಿಕೊಂಡಿರಲಿಲ್ಲ. ಆದರೆ ಈಗ ಮೋದಿ ಅವರನ್ನು ನಾಯಕನೆಂದು ಮನಸಾರೆ ಒಪ್ಪಿಕೊಂಡಿದ್ದೇನೆ ಹತ್ತು ವರ್ಷಗಳಿಂದ ಅವರ ಆಡಳಿತ ಗಮನಿಸುತ್ತಾ ಬಂದಿದ್ದೇನೆ. ನಾನು ಈವರೆಗೂ ಮೋದಿ ಅವರ ವಿರುದ್ಧ ಒಂದೇ ಒಂದು ಮಾತನ್ನೂ ಆಡಿಲ್ಲ ಪ್ರಧಾನಿಯಾಗಿ ನೀಡುತ್ತಿರುವ ಸಮರ್ಥ ಆಡಳಿತ ತೃಪ್ತಿದಾಯಕವಾಗಿದೆ ಎಂದು ನುಡಿದರು.
ನಾನೂ ಸೇರಿ ಆಟಲ್ ಬಿಹಾರಿ ವಾಜಪೇಯಿ, ಡಾ. ಮನಮೋಹನ್‌ಸಿಂಗ್ ಅವರಿಂದ ಮಾಡಲಾಗದ ಅದ್ಭುತ ಕೆಲಸಗಳನ್ನು ಮೋದಿ ಮಾಡಿ ತೋರಿಸಿದ್ದಾರೆ. ಮಾನಸ ಸರೋವರದಲ್ಲಿ ಹುಟ್ಟಿ ಹರಿಯುತ್ತಿದ್ದ ಪವಿತ್ರ ಗಂಗೆ ಕಲುಷಿತವಾಗಿದ್ದಳು. ಆ ಗಂಗೆಯನ್ನು ಶುದ್ದೀಕರಣ ಮಾಡಲು ಕಂಕಣತೊಟ್ಟರು. ಕೆಲವೇ ವರ್ಷಗಳಲ್ಲಿ ಗಂಗೆ ನಿರ್ಮಲವಾದಳು. ಈಗ ಎಳನೀರಿನಂತೆ ಪರಿಶುದ್ಧವಾಗಿ ಹರಿಯುತ್ತಿದ್ದಾಳೆ. ಇದಕ್ಕೆ ಮೋದಿ ಅವರಲ್ಲಿರುವ ಪರಿಶುದ್ಧ ಮನಸ್ಸು ಕಾರಣ ಎಂದು ಹೇಳಿದರು.
ಪ್ರಧಾನಿಯಾಗಿದ್ದರೂ ಮೋದಿ ಅವರು ಕೇದಾರನಾಥ, ಸೋಮನಾಥದಲ್ಲಿ ಪ್ರಾರ್ಥನೆ ಮಾಡುತ್ತಾರೆ. ಅವರಲ್ಲಿರುವ ಅಂತಃಶಕ್ತಿ ಬಹಳ ದೊಡ್ಡದು. ಕಳೆದ 10 ವರ್ಷಗಳ ಅವರ ಆಡಳಿತ, ಕಾರ್ಯವೈಖರಿ ನನಗೆ ಮೆಚ್ಚುಗೆಯಾಗಿದೆ. ಅವರು ಹುಟ್ಟಿದ್ದು ಗುಜರಾತ್, ಕ್ಷೇತ್ರ ಆಯ್ಕೆ ಮಾಡಿಕೊಂಡಿದ್ದು ವಾರಾಣಸಿ. ಕಾಶಿಗೆ ಹೊಸ ರೂಪ ಕೊಟ್ಟರು. ಇದೇ ಕಾರಣಕ್ಕೆ ನಾನು ಅವರನ್ನು ನಾಯಕ ಎಂದು ಒಪ್ಪಿಕೊಂಡಿದ್ದೇನೆ. ಈ ವಿಷಯವಾಗಿ ನಾನು ಸುಳ್ಳು ಹೇಳುವುದಿಲ್ಲ ಎಂದು ಸ್ಪಷ್ಟಪಡಿಸಿದರು.
ಮೋದಿ ಒಬ್ಬ ದೊಡ್ಡ ಮನುಷ್ಯ. ಸಂಸ್ಕಾರವಂತ ಮನುಷ್ಯ ಎನ್ನುವುದನ್ನು ನಾನು ಬಹಳ ಹತ್ತಿರದಿಂದ ನೋಡಿದ್ದೇನೆ. ನಾನು ಕೆಲ ದಿನಗಳ ಹಿಂದೆ ಅವರನ್ನು ಭೇಟಿ ಮಾಡಿದಾಗ ಅವರು ನನ್ನ ಹತ್ತಿರ ಬಂದು ಗೌರವದಿಂದ ಕೈ ಹಿಡಿದು ಕರೆದುಕೊಂಡು ಹೋಗಿ ಕುರ್ಚಿಯಲ್ಲಿ ಕೂರಿಸಿದರು. ಅಂತಹ ದೊಡ್ಡತನವನ್ನು ನಾನು ಯಾರಲ್ಲೂ ಕಂಡಿರಲಿಲ್ಲ ಎಂದು ಹೇಳಿದರು.
ಮೋದಿ ದೈವಾಂಶ ಸಂಭೂತ. ಅವರು 11 ದಿನ ಆಹಾರ ಸೇವಿಸದೆ ಉಪವಾಸವಿರುತ್ತಾರೆಂದರೆ ಅವರಲ್ಲಿರುವ ಅಂತಃಶಕ್ತಿಯ ಅರಿವಾಗುತ್ತದೆ. ಅವರು ರಾಜಕೀಯಕ್ಕಾಗಿ ಇದನ್ನೆಲ್ಲಾ ಮಾಡುತ್ತಿದ್ದಾರೆಂದರೆ ನಾನು ಒಪ್ಪುವುದಿಲ್ಲ. ಇದರಲ್ಲಿ ರಾಜಕೀಯ ಮಾಡುವುದಕ್ಕೆ ಏನಿದೆ. ದೇವರಲ್ಲಿ ಅವರಿಗಿರುವ ಅನನ್ಯ ಭಕ್ತಿ, ಶ್ರದ್ಧೆ ಅವರಿಗೆ ಆ ದಿವ್ಯಶಕ್ತಿಯನ್ನು ನೀಡಿದೆ ಎಂದು ಬಣ್ಣಿಸಿದರು
