ಕಲ್ಲಡ್ಕ : ವಿದ್ಯೆಯ ಉಪಯೋಗ ಸರಿಯಾಗಿ ಆಗದಿದ್ದರೆ ವಿನಾಶ ತಪ್ಪಿದ್ದಲ್ಲ, ವಿದ್ಯೆಯಿಂದ ಗುಣವಂತರಾಗಬೇಕು. ಚತುರನಾಗಬೇಕು. ಶಕ್ತಿವಂತನಾಗಬೇಕು. ಶಕ್ತಿವಂತನು ಕ್ಷಮಾಗುಣವನ್ನು ಹೊಂದಿರಬೇಕು. ಶಕ್ತಿಯಿಲ್ಲದಿದ್ದರೆ ಕ್ಷಮಿಸಲು ಸಾಧ್ಯವಿಲ್ಲ. ಶಕ್ತಿಯಿಂದ ದುರ್ಬಲರ ರಕ್ಷಣೆಯಾಗಬೇಕು. ಬುದ್ದಿಗೆ ಸರಿಯಾದ ಸಂಸ್ಕಾರ ನೀಡಬೇಕು.
ಕಲಿತು ಪಂಡಿತನಾದರೆ ಸಾಲದು. ಸಕಲ ಜೀವಿಗಳನ್ನು ಪ್ರೀತಿಸಬೇಕು. ಇಂತಹ ಸಂಸ್ಕಾರದಿಂದ ವಿಶ್ವವೇ ಕುಟುಂಬವೆಂದು, ಸರ್ವರೂ ಸುಖಿಗಳಾಗಬೇಕೆಂಬ ಶಿಕ್ಷಣ ಭಾರತೀಯ ಪರಂಪರೆಯಿಂದ ಬೆಳೆದು ಬಂದಿದ್ದು ವಿದ್ಯೆಯು ದೇಶದ ಎಳಿಗೆಗೆ ಭದ್ರ ಬುನಾದಿಯಾಗಲಿ ಎಂಬುದಾಗಿ ರಾಷ್ಟ್ರೀಯ ಸ್ವಯಂಸೇವಕ ಸಂಘದ ಸರಸಂಘಚಾಲಕ ಮೋಹನ್ ಭಾಗ್ವತ್ ಹೇಳಿದ್ದಾರೆ
ಅವರು ಕಲ್ಲಡ್ಕ ಶ್ರೀರಾಮ ವಿದ್ಯಾಕೇಂದ್ರದಲ್ಲಿ ಪ್ರಸಿದ್ಧ ಹೊನಲು ಬೆಳಕಿನ ವರ್ಣರಂಜಿತ ಕ್ರೀಡೋತ್ಸವದಲ್ಲಿ ಪಾಲ್ಗೊಂಡು ಮಾತನಾಡಿದರು. ಇಲ್ಲಿನ ಕಾರ್ಯಕ್ರಮ ನೋಡಿದ ಮೇಲೆ ಭಾಷಣದ ಅಗತ್ಯವಿಲ್ಲ ವಿದ್ಯಾಲಯಕ್ಕೆ ಅಭಿನಂದನೆ ಸಲ್ಲಿಸುತ್ತೇನೆ. ಶಿಕ್ಷಣ ನೀತಿ ಮಕ್ಕಳ ಬುದ್ದಿ, ಆತ್ಮ ವಿಕಾಸಕ್ಕೆ ಕಾರಣವಾಗುವಂತಿರಬೇಕು. ಶಿಕ್ಷಣ ಕೇವಲ ಹೊಟ್ಟೆ ತುಂಬಿಸುವುದಕ್ಕೆ ಮಾತ್ರ ಇರುವಂಥದ್ದಲ್ಲ. ಕೇವಲ ಪುಸ್ತಕ ಓದು, ಬರಹಕ್ಕೂ ಸೀಮಿತವಾದುದಲ್ಲ. ಕೇವಲ ಓದು ಬರಹವೇ ಜ್ಞಾನ ಅಲ್ಲ. ಬದಲಿಗೆ ವಿದ್ಯೆ ಇತರರಿಗೆ ಜ್ಞಾನ ನೀಡುವಂತಾಗಬೇಕು. ಧನ ದಾನಕ್ಕೆ ವಿನಿಯೋಗವಾಗಬೇಕು. ಸಮಾಜದಿಂದ, ಪ್ರಕೃತಿಯಿಂದ ಪಡೆದುದನ್ನು ಮತ್ತೆ ಸಮಾಜಕ್ಕೆ ನೀಡಬೇಕು. ಇಂತಹ ವಿದ್ಯೆಯಿಂದಲೇ ಸಾರ್ಥಕ್ಯ ಎಂದರು
ಕಾರ್ಯಕ್ರಮದಲ್ಲಿ ರಾಷ್ಟ್ರೀಯ ಸ್ವಯಂಸೇವಕ ಸಂಘದ ಸಹಸರಕಾರ್ಯವಾಹ ಮುಕುಂದ ಸಿ.ಆರ್., ದಕ್ಷಿಣ ಕ್ಷೇತ್ರೀಯ ಸಂಘಚಾಲಕ್ ಡಾ.ಪಿ.ವಾಮನ್ ಶೆಣೈ, ಅಖಿಲ ಭಾರತೀಯ ಕಾರ್ಯಕಾರಿಣಿಯ ಆಮಂತ್ರಿತ ಸದಸ್ಯ ಕಜಂಪಾಡಿ ಸುಬ್ರಹ್ಮಣ್ಯ ಭಟ್, ಕ್ಷೇತ್ರೀಯ ಪ್ರಚಾರಕ್ ಸುಧೀರ್, ಪ್ರಾಂತ ಪ್ರಚಾರಕ್ ಗುರುಪ್ರಸಾದ್, ಕೈಲಾಸ್, ಸಹಪ್ರಾಂತ ಪ್ರಚಾರಕ್ ನಂದೀಶ್, ಪ್ರಾಂತ ಕಾರ್ಯವಾಹ ಜಯಪ್ರಕಾಶ್, ವಿಭಾಗ ಸಂಘಚಾಲಕ್ ನಾರಾಯಣ ಶೆಣೈ, ಪಟ್ಟಾಭಿರಾಮ
ಪ್ರೊ.ಎಂ.ಬಿ.ಪುರಾಣಿಕ್, ಡಾ.ಸತೀಶ್ ರಾವ್ ಮುಂತಾದವರಲ್ಲದೆ, ಸಂಸದ ಬೃಜೇಶ್ ಚೌಟ, ಶಾಸಕ ರಾಜೇಶ್ ನಾಯಕ್, ಶಾಸಕರಾದ ಉಮಾನಾಥ ಕೋಟ್ಯಾನ್, ಸುನಿಲ್ ಕುಮಾರ್, ಸುರೇಶ ಶೆಟ್ಟಿ ಗುರ್ಮೆ, ಗುರುಪ್ರಸಾದ್ ಗಂಟಿಹೊಳೆ, ಡಾ.ಭರತ್ ಶೆಟ್ಟಿ ವೇದವ್ಯಾಸ ಕಾಮತ್, ಕಿರಣ್ ಕುಮಾರ್ ಕೊಡ್ಲಿ ಹರೀಶ್ ಪೂಂಜ, ಭಾಗೀರಥಿ ಮುರುಳ್ಯ, ಮಾಜಿ ಸಚಿವ ನಾಗರಾಜ ಶೆಟ್ಟಿ ಮಾಜಿ ಶಾಸಕರಾದ ಪದ್ಮನಾಭಕೊಟ್ಟಾರಿ, ರುಕ್ಕಯ ಪೂಜಾರಿ, ರಘುಪತಿ ಭಟ್, ಕೃಷ್ಣ ಪಾಲೆಮಾರ್, ರಂಗಮೂರ್ತಿ, ಉದ್ಯಮಿಗಳಾದ ಅಜಿತ್ ಕುಮಾರ್ ಜೈನ್ ಮುಂಬಯಿ, ಮನೋಜ್ ಕುಮಾರ್ ಮುಂಬೈ, ಪ್ರಕಾಶ ಶೆಟ್ಟಿ ಬಂಜಾರ ಬೆಂಗಳೂರು ಮೊದಲಾದ ರಾಷ್ಟ್ರ ರಾಜ್ಯದ ಗಣ್ಯರು ಇದ್ದರು.
ಪುತ್ತೂರು ವಿದ್ಯಾವರ್ಧಕ ಸಂಘದ ಅಧ್ಯಕ್ಷ ಡಾ.ಪ್ರಭಾಕರ ಭಟ್ ಕಲ್ಲಡ್ಕ ಅವರು ಅಧ್ಯಕ್ಷತೆ ವಹಿಸಿ ಪರಿಚಯಿಸಿದರು. ಸಂಚಾಲಕ ವಸಂತ ಮಾಧವ ಸ್ವಾಗತಿಸಿದರು. ಅಧ್ಯಕ್ಷ ನಾರಾಯಣ ಸೋಮಯಾಜಿ ಸರಸಂಘ ಚಾಲಕರಿಗೆ ಸ್ಮರಣಿಕೆ ನೀಡಿದರು. ರಾಧಾಕೃಷ್ಣ ಅಡ್ಯಂತಾಯ, ಜಿನ್ನಪ್ಪ ಶ್ರೀಮಾನ್ ನಿರೂಪಿಸಿದರು.
