ಬಾಲ್ಯದಲ್ಲಿ ಕಳೆದ ಜೀವನದ ದಿನಗಳು ಕಳೆದುಹೋಗಿವೆ. ಒಟ್ಟಿಗೆ ಜೊತೆಗೆ ಆಡಿದ ಮಿತ್ರರು ಕೆಲಸದಿಂದ ಬಸವಳಿದಿದ್ದಾರೆ. ಕೆಲವರಿಗೆ ಬೊಜ್ಜು ಬಂದರೆ , ಇನ್ನು ಕೆಲವರ ತಲೆ ಕೂದಲ ಬಣ್ಣ ಬೆಳ್ಳಗಾಗಿದೆ, ಎಲ್ಲರಿಗೂ ಅವರದ್ದೇ ಆದಂತಹ ಕೌಟಿಂಬಿಕ ಜವಾಬ್ದಾರಿಗಳಿವೆ. ಎಲ್ಲರಿಗೂ ಚಿಕ್ಕಪುಟ್ಟ ಆರೋಗ್ಯ ಸಮಸ್ಯೆಗಳಿವೆ. ದಿನವಿಡೀ ಪಾದರಸದಂತೆ ಓಡಾಡುತ್ತಿದ್ದ ಆಟವಾಡುತ್ತಿದ್ದ ಗೆಳೆಯರು ಈಗ ಯಾಂತ್ರಿಕ ಬದುಕಿಗೆ ಸಿಕ್ಕಿ ಬಸವಳಿದಿದ್ದಾರೆ. ಕೆಲವರಿಗೆ ಹಣದ ಸಮಸ್ಯೆ ಆದರೆ
ಇನ್ನು ಕೆಲವರಿಗೆ ಬ್ಯಾಂಕ್ ನಲ್ಲಿ ಲೋನ್ ಸಿಗೋದಿಲ್ಲ ಎಂಬ ಸಮಸ್ಯೆ. ಇನ್ನು ಕೆಲವರಿಗೆ ಈ ವಯಸ್ಸಿನಲ್ಲಿ ಆರೋಗ್ಯ ಏನಾಗುವುದು ಎಂಬ ಆತಂಕ. ಎಲ್ಲರೂ ಅವರವರ ಕೆಲಸದಲ್ಲಿ ಅವರವರ ಜೀವನದಲ್ಲಿ ನಿರತರಾಗಿದ್ದಾರೆ. ಚಿಕ್ಕಂದಿನಲ್ಲಿದ್ದ ಕಣ್ಣಿನ ತೇಜಸ್ಸು ಈಗ ಕಡಿಮೆಯಾಗಿದೆ. ಯೌವ್ವನದಲ್ಲಿ ಪ್ರೇಮಪತ್ರ ಬರೆಯುತ್ತಿದ್ದ ಕೈಗಳು ಈಗ ಆಸ್ಪತ್ರೆಯಲ್ಲಿ ಫಾರ್ಮ್ ಭರ್ತಿ ಮಾಡುತ್ತಿವೆ. ಬಾಲ್ಯದ ಯವ್ವನದ ಫೋಟೋಗಳನ್ನು ನೋಡಿದಾಗ ಬಾಲ್ಯದ ತುಂಟಾಟದ ದಿನಗಳು ನೆನಪಾಗುತ್ತವೆ. ಸಮಯ ಹೋಗಿದ್ದೆ ಗೊತ್ತಾಗಿಲ್ಲ ಆದರೆ ನಮಗೆ ಮಾತ್ರ ವಯಸ್ಸು ವರ್ಷದಿಂದ ವರ್ಷಕ್ಕೆ ಜಾಸ್ತಿ ಆಗುತ್ತಾ ಹೋಯಿತು. ಚಿಕ್ಕಂದಿನಲ್ಲಿ ಆಟವಾಡಿದ ಮಿತ್ರರು ಸಮಯವಿಲ್ಲದೆ ಬಸವಳಿದಿದ್ದಾರೆ. ಜೀವನ ಅಂದ್ರೆ ಇದೆ ಅಲ್ವಾ.
ಪ್ರದೀಪ್ ಕುಮಾರ್ ಕೋಮುಂಜೆ
